Ku wa Kane tariki ya 07 Nyakanga mu Karere ka Rulindo, Polisi yafashe umugabo witwa Dusengimana Vedaste w’imyaka 30 afite urumogi ibiro 10 arutwaye kuri moto, ngo yari arujyanye i Kigali.
Yafatiwe mu Murenge wa Mbogo, Akagali ka Rurenge, Umudugudu wa Ruhondo.
Polisi y’u Rwanda ivuga ko yashyize imbaraga mu bikorwa byo gufata abantu bakoresha cyangwa abacuruza ibiyobyabwenge, kandi bikaba birimo gutanga umusaruro hirya no hino mu gihugu.
Superintendent of Police (SP) Alex Ndayisenga, ushinzwe guhuza ibikorwa bya Polisi n’abaturage mu Ntara y’Amajyaruguru yavuze ko uyu Dusengimana yafatiwe mu Muhanda Rulindo-Kigali avuye ahitwa Kinihira anyuze mu Murenge wa Mbogo yerekeza mu Mujyi wa Kigali. Yavuze ko yari ashyiriye abakiriya be urumogi.
Uyu ngo yafashwe biturutse ku makuru yatanzwe n’umuturage wari uzi ko Dusengimana asanzwe acuruza urumogi.
Superintendent of Police (SP) Alex Ndayisenga yagize ati: “Polisi yahawe amakuru n’umuturage utuye ahitwa Kinihira ko Dusengimana apakiye urumogi kuri moto ifite nimero RF 777V, kandi arushyiriye abakiriya be mu Mujyi wa Kigali, amakuru yavugaga ko yanze kunyura umuhanda munini uturuka mu Karere ka Rulindo werekeza i Kigali ahubwo anyura mu Muhanda Mukoto-Mbogo-Shyorongi.”
Polisi ngo ikimara kumenya ayo makuru, Abapolisi bahise bashyira bariyeri mu Mudugudu wa Rusagara, Dusengimana akibabona ava kuri moto ariruka.
Ati “Abaturage bafatanyije n’Abapolisi bamwirutseho baramufata nyuma y’uko basanze umufuka yari ahetse urimo ibiro 10 by’urumogi.”
SP Ndayisenga yashimye uruhare rw’abaturage batumye uyu Dusengimana afatwa dore ko yafatwaga nka ruharwa mu gucuruza ibiyobyabwenge.
Yasoje asaba abaturage gukomeza gutanga amakuru y’abantu bose bacuruza ibiyobyabwenge kugira ngo bafatwe bahanwe n’amategeko.
Dusengimana yashyikirijwe urwego rw’igihugu rw’ubugenzacyaha (RIB) rukorera kuri sitasiyo ya Bushoki ngo hakurikizwe amategeko.
Urumogi rushyirwa ku rutonde rw’ibiyobyabwenge bihambaye mu Rwanda. Ubihamijwe n’urukiko ahanishwa igifungo cya burundu n’ihazabu y’amafaranga y’u Rwanda arenze miliyoni 20 ariko atarenze miliyoni 30Frw.
IVOMO: RNP Website
UMUSEKE.RW
URUMOGI,kimwe na COCAINE,ni imali ishyushye cyane.Guca Ibiyobyabwenge (Drugs) ku isi byarananiranye.Buri mwaka,Amerika ishora + 50 Billions/Milliards USD mu kurwanya Ibiyo-byabwenge ku isi hose,ariko byaranze.Mu bihugu bimwe byo muli Latin America,habayo Companies zihinga kandi zigacuruza Ibiyobyabwenge,zitwa Drug Cartels,zifite ingufu nk’iza National Army and Police.Zifite amato n’indege z’intambara.Umuti uzaba uwuhe?Bible itanga igisubizo: Nkuko Imigani 2,imirongo ya 21 na 22 havuga,ku munsi wa nyuma Imana izakura mu isi abantu bose bakora ibyo itubuza,isigaze abantu bayumvira gusa.Niwo muti rukumbi.