Nigeria: Nibura imfungwa 400 zaburiwe irengero bivuye ku gitero cyagabwe kuri gereza iri mu Murwa mukuru Abuja, nk’uko inzego z’ubuyobozi zabitangaje.
Imfungwa 4, umwe mu bacungagereza, na benshi mu bagabye igitero bishwe nk’uko ubuyobozi bubivuga.
Umutwe wa Boko Haram ugendera ku mahame ya Kisilamu ni wo ukekwa gukora iki gitero, ndetse birakekwa ko mu mfungwa zatorotse zirimo na benshi bari abarwanyi b’uyu mutwe.
Kuva mu mwaka wa 2020 imfungwa 5,000 zatorotse gereza zo muri Nigeria.
Nijoro ku wa Kabiri humvikanye urufaya rw’amasasu kuri gereza ya Kuje iri hanze gato y’umurwa mukuru Abuja.
Umwe mu baturage yabwiye Ibiro Ntaramakuru, AFP ati “Twumvise amasasu ku muhanda. Twaketse ko ari abajura bitwaje intwaro.”
Yongeraho ati “Nyuma haje kumvikana ikintu gituritse. Humvikana icya kabiri n’icya gatatu.”
Urwego rushinzwe amagereza muri Nigeria rwavuze ko imfungwa 4 zishwe, izindi 16 zirakomereka ubwo igitero cyabaga.
Abayobozi bavuze ko bamwe abantu bakomeye bafunzwe batari mu mfungwa zatorotse.
Imfungwa 1,000 zari muri gereza ubwo habaga igitero zose zatorotse, abayobozi bashinzwe amagereza bakavuga ko nyuma abagera kuri 443 bongeye gufatwa.
Minisitiri w’Ingabo, Bashir Magashi yatangarije Abanyamakuru ko bikekwa cyane ko igitero cyagabwe n’umutwe wa Boko Haram, ndetse abarwanyi bawo 64 babashije gutoroka.
Ati “Nta n’umwe muri bo ukiri muri gereza, abarwanyi bawo bose bahunze.”
Umutwe wa Leta ya Kisilamu mu gace ka Africa y’iburengerazuba wiyita ISWAP wigambye kiriya gitero, uvuga ko wafunguje imfungwa nyinshi.
Kuva muri 2016 uyu mutwe wa ISWAP watandukanye na Boko Haram ariko kenshi iyo abayobozi bawuvuga hari ubwo baba bavuga Boko Haram cyangwa wo.
Perezida wa Nigeria utotohewe n’abamunenga kuba atabashije gukemura ibibazo by’umutekano muke mu gihugu cye yavuze ko kuba imfungwa zingana kuriya zacitse ari uko inzego z’ubutasi n’igisirikare bifite integer nke.
Yasabye ko hazakorwa raporo irambuye kuri kiriya gitero.
IVOMO: BBC
UMUSEKE.RW
