Rutahizamu w’ikipe y’igihugu ya Norvège na Manchester City, Erling Haaland yashyizeho agahigo ko gutsinda ibitego byinshi mu mikino itanu ya Mbere muri shampiyona y’u Bwongereza izwi nka Premier League.
Ku wa Gatatu tariki 31 Kanama 2022, ikipe ya Manchester City yatsinze Nottingham Forest ibitego 6-0 mu mukino w’umunsi wa Gatanu wa shampiyona.
Muri ibi bitego bitandatu, rutahizamu Erling Haaland yatsinzemo bitatu bya Mbere wenyine ku munota wa 12, 23 na 38. Ibindi byatsinzwe na Joao Cancelo na Julian Alvarez watsinzemo bibiri.
Ibitego Erling Haaland yatsinze, byatumye aca agahigo ko kuba umukinnyi watsinze ibitego byinshi [9] mu mikino itanu ya Mbere muri shampiyona y’icyiciro cya Mbere mu Bwongereza, Premier League, nyuma ya Mick Quinn na Sergio Agüero batsinze ibitego umunani mu mikino itanu ya Mbere bakinnye muri Premier League.
Mu makipe uyu rutahizamu yatsinzemo ibitego byinshi [3 buri imwe], harimo Crystal Palace na Nottingham Forest.
UMUSEKE.RW
